REGRESO A CASA BAJO EL FUEGO

LO QUE VOI FACER /That will I do

Suheir Hammad (traducción de Sofía Castañón)

Nun voi

a baillar al son del to tambor

de guerra. Nun voi

emprestar mio alma ni mios güesos al to tambor

de guerra. Nun voi

a baillar al to

ritmu. Conozo esi ritmu.

Ye parao. Conozo

bien de cerca esa piel

que tas golpiando. Tuvo

viva una vegada

cazada robada

estirayada. Nun voi

a baillar pa la to guerra

de tambores. Nun voi españar

xirar romper por ti. Nun

voi odiar pa ti nin

siquiera voi odiate a ti. Nun voi

matar por ti. Sobremanera

nun voi morrer

por ti. Nun voi velar 

a los muertos con asesinatu nin

suicidiu. Nun voi alliniame

contigo nin baillar a les bombes

porque tolos demás

tean baillando. Tolos demás pueden tar

equivocaos. La vida ye un derechu, nun ye

collateral, nun ye casual. Nun voi

escaecer d’ónde vengo. Voi

construyir el mio propiu tambor.

Voi xuntar a la mio xente

cerquina y el nuesu cantu

va ser baille. El nuesu

rumor va ser tambor. Nun voi

ser un xuegu. Nun voi

a dexar el mio nome

ni el mio ritmu al to

son. Voi baillar

y voi resistir y voi baillar y

voi aguantar y voi baillar. Esti llatíu suena más altu

que la muerte. El to tambor de guerra

nun suena más altu qu’esta respiración.